"Ary Andriamanitry ny fiadanana anie hahamasina anareo samy ho tanteraka, ka aoka harovana avokoa ny fanahinareo sy ny ainareo ary ny tenanareo ho tanteraka ka tsy hanan-tsiny amin'ny fihavian Jesosy Kristy Tompontsika." - 1 Tes. 5:23.
Mofon’aina:
Fanamasinana — firy moa no tena mahatakatra ny hevitr'izany feno? Tratry ny "tazon'"ny filan'ny nofo ny saina ka manjavozavo. Mila diovina ny eritreritra. Ho toy ny ahoana re ny lehilahy sy ny vehivavy raha takany fa ny fitondrany ny vatany dia misy ifandraisany tanteraka amin'ny hery sy ny fahadiovan'ny saina sy ny fo e! (...) Navotana tamin'ny vidiny lafo tokoa ny lehilahy sy ny vehivavy, dia ny ain'ny Zanak'Andriamanitra mihitsy! Zava-dratsy tokoa ny fametrahan'izy ireo ny tenany eo amin'ny toerana izay manimba ny heriny ara-batana sy ara-tsaina ary ara-panahy, ka hahaverezan'ny fahavitrihany sy ny fahadiovany. Tsy afaka manolotra fanatitra ankasitrahan'Andriamanitra ny olona toy izany.
Ny Kristianina marina dia manao fanandramana izay mitondra azy ho amin'ny fahamasinana. Tsy misy fahatsapana ho meloka ao amin'ny fierireretany, na fahalovana ao amin'ny fanahiny. Hita eo amin'ny fiainany anatiny sy ivelany ny lalan'Andriamanitra, miaraka amin' ireo foto-kevitra sy fepetra ao anatiny. Manazava ny sainy ny fahazavan'ny fahamarinana. Voahaisotra izay rehetra manelanelana ny fanahiny amin'Andriamanitra noho ny firedaredan'ny fitiavany ny Mpanavotra. Manjary sitrapony ny sitrapon'Andriamanitra, dia sitrapo madio, tsara, mendrika sy masina. Maneho taratra ny fahazavan'ny lanitra ny endriny. Tempoly mendrika ny Fanahy Masina ny tenany. (...) – L, 139, 1898.
Maro ny Kristianina miezaka hitandrina ny lalana, kanefa tsy mahita fiadanana na fifaliana firy. Noho ny tsy fampiasany ny finoany no mahatonga izany tsy fahampian'ny fiainany ara-panahy izany. Toy ny mandeha eo amin'ny tany mangetana izy, sy mamakivaky efitra karankaina. Afa-po amin'ny kely izy, kanefa tokony hangataka betsaka, satria tsy misy fetrany ny teny fikasan'Andriamanitra. (...) Irin'ny Tompo raha samy hanana fahasambarana sy fiadanana eo amin'ny fankatoavana ny zanany rehetra. Amin'ny fampiasany ny finoany no handraisan'ny Kristianina fitahiana. Avy amin'ny finoana no anavaozana ny fahabangana rehetra ao amin'ny toetra, sy anadiovana ny fahalotoana rehetra, anitsiana ny fahadisoana rehetra, ary ampitomboana ny fahatanterahana rehetra. - VM, tt. 498,499.