"Izay lehilahy mahazo vady dia mahazo zava-tsoa sady mahita sitraka amin'i Jehôvah ." - Ohab. 18:22.
Mofon’aina:
Nahazo fankasitrahana sy tso-drano avy amin'i Kristy ny fanambadiana, ary zava-masina no tokony handraisana azy. Tsy manohitra ny drafitry ny Tompo ny fivavahana marina. Andriamanitra no nanendry ny vehivavy hikambana amin'ny lehilahy ao anatin'ny fatoram-panambadiana masina, mba hanorina tokantrano izay hosatrohina voninahitra, ary ho tandindon'ny fianakaviana any an-danitra. (...) Ny fanambadiana ao anatin'ny fahadiovana sy fahamasinana, mifanaraka amin'ny rariny sy ny hitsiny, no anisan'ny fitahiana lehibe indrindra nomena ny taranak'olombelona. (...)
Ny fitiavan'Andriamanitra aseho ao amin'i Kristy dia tsy mandrava velively ny fitiavan'olombelona, fa mandray sy manadio tsara izany. (...) Tsy afaka hitondra ny voady sarobidy ny fitiavan'olombelona raha tsy miray amin'ny fomban'Andriamanitra sy hofanina ho mendrika ny lanitra. Maniry hahita tokantrano sambatra i Jesôsy. Ny hafanan'ny fisakaizana marina sy ny fitiavana mampifamatotra ny fon'ny mpivady dia santatry ny lanitra. Drafitr'Andriamanitra ny isian 'ny fitiavana sy firindrana tanteraka eo amin'ireo izay miditra ao amin'ny fanambadiana. Aoka ny ampakarina sy ny mpampakatra hankeo anatrehan'ny lanitra, hifanaiky fa hifankatia araka ny nandidian'Andriamanitra azy ireo. (...)
Nahary ny vehivavy avy tamin'ny lehilahy Andriamanitra, mba ho namana sy mpanampy tandrify azy, ho iray aminy, hampifaly, hampahery, ary ho fitahiana ho azy; ny lehilahy kosa natao ho mpanampy mahery ho an'ny vehivavy. Izay rehetra miditra ao amin'ny fanambadiana amin'ny tanjona masina ny lahy mba hahazo ny fitiavana madio avy amin'ny fon'ny vavy, ary ny vavy mba hanalefaka sy hanatsara ny toetran'ny vadiny ary hameno izany — dia manatanteraka ny drafitr'Andriamanitra ho azy ireo.
Tsy tonga handrava io rafitra io i Kristy, fa hamerina izany amin'ny fahamasinany sy ny fahamboniany tany am-boalohany. Tonga Izy hamerina ny endrika ara-panahin'Andriamanitra ao amin'ny olombelona, ary ny fankasitrahany ny fatoram-panambadiana no nanombohany ny asany. Ilay nahary ny mpivady masina voalohany sy namorona paradisa ho azy ireo, no nametraka ny tombokaseny teo amin'ny rafitry ny fanambadiana, izay notsofin-drano voalohany tao Edena, fony niara-nihira ny kintan'ny maraina ary nihoby avokoa ireo zanak'Andriamanitra. – Ms, 16, 1899.