"Ary Jehovah Andriamanitra nanao hoe: Tsy tsara raha irery ralehilahy; dia hanaovako vady sahaza ho azy izy." - Gen. 2:18.
Mofon’aina:
Hitako matetika ireto teny ireto: «Miankina amin'ny vintana ny fanambadiana.» Toa mino izany fanambarana izany ny olona sasany, ary vavolombelona maneho izany ny fiainan-tokantranony. Tsy miankina amin'ny vintana velively anefa ny tena fanambadiana marina. Naorina tany Edena ny fanambadiana. Taorian'ny namoronana an'i Adama, dia hoy ny Tompo: «Tsy tsara raha irery ralehilahy; dia hanaovako vady sahaza ho azy izy. » Ireo anjelin'Andriamanitra no vavolombelona rehefa natolotry ny Tompo an'i Adama i Eva. Vitsy ihany ny mpivady no tena tafaray rehefa tanteraka ny lanonam-panambadiana. Tsy mampiray azy ho nofo iray vetivety foana eo ny voady nifanaovany. Any amin'ny fiainany ho avy no tsy maintsy mitranga ny fifamatoran'izy roa ao anatin'ny fiainam-panambadiana. Mety ho tonga fahasambarana tokoa io firaisana io, raha tena mifanome fitiavana avy amin'ny fo marina ny andaniny sy ny ankilany.
Ny fahelan'ny fotoana anefa dia manaisotra ilay nofinofy mamy noeritreretina momba ny fanambadiana, ary avy eo misy soso-kevitr'i Satana tonga ao an-tsaina manao hoe: «Tsy tena mifankatia araka ny fiheverantsika azy akory isika.» Roahy hiala ao an-tsaina izany. (...)
Aoka ny tsirairay hanadino ny tenany; aza manaiky hanome fahafaham-po an'i Satana amin'ny fandraisanareo ny heviny. Hataony izay hahatonga anareo hifampiahiahy, hifampialona amin' izao zava-bitika rehetra izao, mba hahitany hirika handravana ny fifankatiavanareo. (...) Rehefa tsapanareo manjavona Hay nofinofy mamy tany am-boalohany, dia aoka ny tsirairay handinika - tsy amin'ny fientanam-po - ny fomba hahafahany manatsara ny fiainam-panambadiany ho araka izay tian'Andriamanitra.
Fanomezan-tsarobidy avy amin' Andriamanitra ny fiainana, ary tsy tokony holaniana foana amin'ny fanao feno fitiavan-tena sy nenina, na amin'ny fanehoana fangatsiahana sy farikahalana. Aoka ny mpivady hifampiresaka momba ny zavatra rehetra. Aoka hohavaoziny ny fifanehoam-pitiavany tany am-boalohany; aoka hifanaiky heloka, nefa mitandrema tsara mba tsy ny fahadisoan'ny vadiny no hotanisain'ny vavy na ny lahy. MivonOna hanao izay rehetra azonao atao ho an'ny vadinao, dia ho tonga fatorana mahafinaritra indrindra ny fatoran'ny fanambadiana. Mety haneho ny fiainan-danitra tokoa ny tokantranonareo. – L, 10, 1894.