"Ary ny amiko, dia manohana ahy amin 'ny fahitsiako Hianao, ka mampitoetra ahy eo anatrehanao mandrakizay."- Sal. 41:12
Mofon’aina:
Eo amin'izay rehetra ataony eo amin'ny fiainana, ny tena Kristianina dia miaina araka izay iriny hahitan'ny manodidina azy. Ny fahamarinana sy ny fahitsiana no mitari-dalana azy. Tsy manao teti-dratsy izy ka tsy misy tokony hafeniny. Mety ho voakiana izy, mety hozahan-toetra; nefa ao anatin'izany rehetra izany dia mamirapiratra toy ny volamena tsara ny fahatokiany tsy voahozongozona. Naman' izay rehetra mifandray aminy izy ary mpanasoa azy ireny, matoky azy ny olona satria mendri-pitokisana izy. (...) Manamaivana ny fahasahiranan'ireo rahalahy mahantra izy. Tsy mitady izay hampitomboana ny hareny amin'ny fanararaotana ny fahavoazan'ny namany izy. Izay vidiny ara-drariny ihany no ivarotany amin'ny hafa. Ary raha misy tsy fahatomombanana ny entana amidiny dia lazainy mivantana amin'ny mpividy izany, na dia hahafaty antoka azy aza ny fanaovana izany. (...)
Fantatr'i Satana tsara ny hery miasa mangina avy amin'ny fiainan'ny olona manana fahamendrehana mafy orina ka miezaka mafy izy mba hanakana ny olona tsy hanana fiainana toy izany. Manatona azy ireo amin'ny fakam-panahy maharenoka izy, ka mampanantena harena, toerana ambony, voninahitra araka izao tontolo izao, raha toa izy ireo miala amin'ny fitsipiky ny fahamarinana. Mahomby tokoa izy amin'izany. (...) Tsy ireo izay very harena no tandindomin-doza indrindra, fa ireo izay nahazo harem-bevava. (...) Eny, asaina mivavaka ny lehilahy sy ny vehivavy ao anatin'ny fahoriana. Kanefa ireo miaina ao anatin'ny harena no tena mila ny vavak'ireo mpanompon'Andriamanitra, satria izy ireo no tena tandindomin-doza tsy hahazo famonjena. (...)
Ny tena fivavahana dia tsy zavatra andrakandramana fa tena fanahafana an'i Kristy. Arahin'Andriamanitra maso ary ampamoahiny ny tsirairay ka zahany toetra araka ny vokatry ny asany avy. Tsy ho ela dia ho re ny antso hoe: "Mamoaha ny amin'ny fitandremanao ny fananako." - Lio. 16:2.- Wm, 26 Mey 1908 (ST, 19 Febroary 1902).