"Namelatra ny tanako mandritra ny andro Aho tamin'ny firenena miodina, izay mandeha amin'ny lalana tsy tsara araka ny fisainany ihany." - Isa. 65:2.
Mofon'Aina:
Manatsotra ny Tanany isan'andro, amin'ny alalan' i Kristy, mba hanasa ireo mila fanampiana ilay Tompo Andriamanitsika. (...) Tsy manosi-bohon-tanana na iza na iza Izy. (...) Voninahitra ho Azy ny manome famelan-keloka ho an'ny lohan'ny mpanota. Hesoriny ny haza eo amin'ny mahery, hafahany ny mpifatotra (...). Hampietry ny rojo volamenan'ny famindrampony ho amin'ny toerana fadiranovana indrindra sy feno fahotana misy ny olombelona Izy ka hanandratra ny fanahy ambany izay mararin'ny fahotana. Tsy maintsy manam-pahavononana ny hanatona Azy anefa ny olombelona ka hiara-miasa ho famonjena ny fanahiny amin'ny fandraisana ny tombontsoa atolotr'Andriamanitra azy. Tsy manery na iza na iza ny Tompo. Omanina hampitafiana ny mpanota ny akanjom-pahamarinana tsy misy pentin'i Kristy, kanefa tsy maintsy ho very izy raha manda izany.
Azo fafana amin'ny ran'i Kristy ny lasa izay voarakitra; azo diovina indray ny pejy ka atao fotsy. "Avia ary hifandahatra isika, hoy Jehôvah : na dia mena tahaka ny jaky aza ny fahotanareo, dia ho fotsy tahaka ny oram-panala, Na dia mangatrakatraka tahaka ny sily aza, dia ho tahaka ny volon'ondry fotsy." - Isa. 1:18. (...)
Sarobidy amintsika tokoa ny teny avy amin'ny molotr'i Jesôsy hoe: "voavela ny helokao" - Mat. 9:2. Hoy Izy: "Efa nentiko ny fahotanao, ny Tenako teo amin'ny hazo fijalian'i Kalvary no nitondra izany." Hitany ny fahorianao. Mipetraka eo an-dohan'ny fanahy torotoro rehetra ny Tanany, ary tonga Mpisolovavantsika eo anoloan'ny Ray i Jesôsy no sady Mpamonjintsika. Ny fo mietry sy torotoro no hahazo famelana be. (...)
Azontsika aseho indray amin'ny hafa ny fangorahany be fitiavana, dia ireo hafa izay mirenireny any amin'ny lala-miolikoliky ny fahotana. (...) Fahamoram-panahy lehibe sy fangorahana no hameno ny fanahy eo anatrehan'ireo izay mbola eo ambany fanapahan'i Satana. Tokony hitoetra betsaka ao amin'ny lehilahy sy ny vehivavy i Kristy, satria tokony hiaina ny fiainan'i Kristy izy ireo amin'ny fitondrana fitahiana sy fahazavana ho an'ny hafa, ary koa amin'ny fitondrana fanantenana sy fiadanana ary fitiavana ho azy ireo. - TMK, t. 235.