"Ny Sabatako no tandremo; fa famantarana ho Amiko, sy ho aminareo hatramin'ny taranakareo fana mandimby izany, mba ho fantatrareo fa Izaho no Jehovah Izay manamasina anareo." - Eks. 31:13.
Mofon’aina:
Aoka ny olona rehetra hitady an'i Jehôvah. Eo anoloantsika ny mandrakizay ka tsy azonao atao ny hamela ny andro iray ho lasa kanefa tsy niandany tamin'ny Tompo. Moa ve ianao tsy hanao ny anjara asa izay notendren' Andriamanitra hataonao ao anatin'ireo toe-javatra mamarana ny tantaran'ny tany?
Tsy takatry ny saina ny fanandramana hiainan'ireo vahoakan'Andriamanitra izay velona eto an-tany rehefa hiharo ny fahoriana tamin'ny lasa sy ny voninahitry ny lanitra. Handeha eo amin'ny fahazavana avy eo amin'ny seza fiandrianan'Andriamanitra izy ireo. Amin'ny alalan'ireo anjely no hisian'ny fifandraisana tsy tapaka eo amin'ny lanitra sy ny tany. Ary i Satana, hodidinin'ireo anjely ratsy, no sady mitonona ho Andriamanitra, dia hanao fahagagana samihafa, mba hamitahana na dia izay voafidy aza raha azo atao. (...)Ao amin'ny famantarana voalazan' ny Eks. 31:12-18 no hahitan' ireo vahoakan 'Andriamanitra voazaha toetra ny heriny. Ny Teny velona - "Voasoratra hoe" - no tokony hiandanian'izy ireo. Io no hany fanorenana hahazoany mijoro tsy amin-tahotra. Ireo izay nanapaka ny fanekena nifanaovany tamin'Andriamanitra dia tsy hanana fanantenana amin' i zany andro izany (...).
Hiavaka indrindra amin'ny fanajany ny didy fahefatra ireo izay miankohoka amin'Andriamanitra, satria io no famantarana ny heriny mamorona sy vavolombelon'ny fitakiany ny fiankohofana Aminy sy ny fanajan'ny olona Azy. Ireo ratsy fanahy kosa dia hiavaka amin'ny fiezahany handrodana ny tsangambaton'ny Mpamorona ka hanandratra izay naorin'i Rôma. Ao anatin'ny fifanandrinana, dia hizara ho sokajy roa lehibe ny tontolo kristianina - ireo izay mitandrina ny didin'Andriamanitra sy mitana ny finoana an' i Jesôsy ary ireo izay miankohoka amin'ny bibidia sy ny sariny no sady mandray ny marika famantarana azy. (...)
Fitsapana sy fizahan-toetra maha-tahotra no miandry ireo vahoakan' Andriamanitra. Manetsika ny firenena avy any amin'ny sisin'ny tany ka hatrany amin'ny tendrony ilany ny toe-tsaina liana ady. Ao anatin'ny fotoan-tsarotra izay ho avy anefa (...) dia hitoetra tsy hihozongozona ny vahoaka voafidin'Andriamanitra. Tsy ho vitan'i Satana sy ireo anjeliny ny hanimba azy ireo; satria anjely mahery marobe no hiaro azy. - TDG, t. 69.