Vakio ny Jao. 4:27-29. Inona ny fihetsika manaitra nataon'ilay vehivavy?
Tapaka noho ny fahatongavan'ireo mpianatra ny resaka nifanaovan'i Jesôsy tamin'ilay vehivavy. Gaga noho ny fahitana an'i Jesôsy niresaka tamin'ny vehivavy iray ireo mpianatra ireo; tsy nanontany Azy ny amin'izany anefa izy fa nandrisika Azy mba hihinan-kanina fotsiny.
Tetsy ankilan'izany dia nandao ny sininy ravehivavy ka nihazakazaka nankany an-tanana mba hizara ny fanandramana vao avy niainany niaraka tamin'i Jesôsy.
Vakio ny Jao. 4:30-42. Inona no nitranga taorian'io fihaonana io, ary inona ny lesona ampianarin'izany mikasika ny fielezan'ny filazantsara?
Toa hafahafa ny fahitana fa manapaka ny tantara momba ny fiovam-pon'olona maro tao amin'ilay tanana ny fitantaran'i Jesôsy mikasika ny fijinjana. Tian'i Jaona anefa ny hahitantsika ny fahatakaran'i Jesôsy ny zava-nitranga. Zava-dehibe lavitra ho Azy mihoatra noho ny fihinanan-kanina ny fizarana ny drafi-pamonjena tamin'ny vehivavy Samaritana iray. Ny hitarika ny fanahintsika ho amin'ny famonjena no tanjony, ary nampiasa io fotoana fanararaotra io Izy mba hampianarana ny mpianany ny fahamehan'ny fizarana ny filazantsara amin'ny olona rehetra, eny fa na ireo izay tsy mitovy amin'izy ireo aza.
Misy toe-javatra manan-danja maro ao amin'ny filazantsaran'i Jaona, ary azo antoka fa anankiray amin'izany ny Jao. 4:39-42. Maro tamin'ireo Samaritana no nino noho ny fijoroana ho vavolombelona nataon'ilay vehivavy izay nilaza hoe: "Nolazainy tamiko avokoa izay rehetra nataoko" - Jao. 4:39.
Nangataka tamin'i Jesôsy ny mba hijanonany teo aminy ireo Samaritana. Vokatr'izany dia nitombo ny isan'ireo nino noho ny amin'ny Tenin'i Jesôsy. "Ary maro koa no nino noho ny teniny ka nanao tamin-dravehivavy hoe: Tsy noho ny filazanao ihany no inoanay, fa ny tenanay no mandre, ka fantatray fa Izy tokoa no Mpamonjy izao tontolo izao." - Jao. 4:42.
Inona no tokony hambaran'io tantara io mikasika ny herin'ny fijoroana ho vavolombelona na dia olona iray ihany aza no manao izany? Manao ahoana ny herin'ny fijoroanao ho vavolombelona ny amin'izay nataon'i Jesôsy teo amin'ny fiainanao?