"Koa amin'izany na inona na inona tianareo hataon'ny olona aminareo, dia mba ataovy aminy kosa tahaka izany; fa izany no lalàna sy mpaminany." - Mat. 7:12.
Mofon’aina:
Ny olona tena matahotra an'Andriamanitra dia hifidy ny hiasa mafy andro aman'alina mba hihinanana mofo tsizarizary toy izay hampanaram-po ny fankamamiana tombontsoa avy amin'ny fampahoriana ny mpitondratena sy ny kamboty na koa amin'ny fandrobana ny zon'ny vahiny. Nataon'ny Mpamonjintsika izay hahatakaran'ireo mpihaino Azy fa ny olona izay manambaka ny namany amin'ny tsipirian-javatra bitika dia hanandrana hanao izany amin-javatra lehibe kokoa raha misy ny toe-javatra ahafahany manao izany. Mandrodana ny fefy ny fialana kely foana amin'ny fahitsiana ary manomana ny fo ho amin'ny fanaovana ny tsy marina bebe kokoa. Tamin'ny torolalana sy ny ohatra no nampianaran'i Kristy fa ny fahitsiana hentitra indrindra no tokony hifehy ny fitondrantenantsika manoloana ny olombelona namantsika. Izao no nambaran'ilay Mpampianatra avy any an-danitra: "na inona na inona tianareo hataon'ny olona aminareo, dia mba ataovy aminy kosa tahaka izany."
Rehefa mahazo tombontsoa avy amin'ny fahavoazan'ny hafa nyolona dia manjary donto ny fisainany ka tsy mety iasan'ny hery miasa manginan'ny Fanahin'Andriamanitra intsony. (...) Tsara kokoa ny mahantra noho ny mandainga; tsara kokoa ny noana noho ny mangalatra (…). Tompon'andraikitra amin' ny ampahany lehibe amin'ireo fahotan'ny mambra ao aminy ny fiangonana; mankasitraka ny ratsy izy raha toa tsy miteny mafy izany. Tsy ny hery miasa mangina avy amin'ireo mpanohitra miharihary sy ny tsy mahatoky ary ny mpiteny ratsy an'Andriamanitra no tokony hatahoran'ny fiangonana indrindra fa ny an'ireo mpampianatra momba an'i Kristy nefa tsy mitondra tena araka izany. Ireny no manakana ny fitahian'Andriamanitra tsy ho amin'ny Isiraely. (...)
Tsy amin'ny Sabata (...) ihany no anehoana ny tena fivavahana marina fa natao ho an'ny andro sy ny toerana rehetra izany. (...) Ireo izay manana ny fivavahana marina dia haneho fahitsiana eo amin'ny asa sy ny raharahany rehetra tahaka izay ataony rehefa mitondra ny fivavahany eo amin'ny seza fiandrianan'ny fahasoavana izy. - SW, 10 Mey 1904