"Ry malala, mananatra anareo aho, satria vahiny sy mpivahiny hianareo, fadio ny filan'ny nofo, fa miady amin'ny fanahy ireny; ary aoka ho tsara ny fitondrantenanareo eo amin 'ny jentilisa, mba hankalazany an’Andriamanitra amin'ny andro famangiana noho ny ahitany ny asa tsara ataonareo, dia izay anendrikendrehany anareo ho mpanao ratsy." — 1 Pet. 2:11,12.
Mofon’ainna:
Amin'ny fahantomoran'ny fiafaran'ny tantaran'ny tany no hiasan'i Satana amin'ny heriny rehetra tahaka ny nataony tamin'ny Isiraely fahiny. Ny fakam-panahy izay nampiasainy talohan'ny nidirany tao amin'ny Tany Nampanantenaina indrindra ihany no ampiasainy. Hamelatra fandrika eo anoloan'izay milaza azy ho mitandrina ny didin'Andriamanitra sy efa eo amoron'ny Kananan'ny lanitra izy. Hanao izay fara heriny izy hamitahana ireo fanahy sy handavoana ireo mitonona ho vahoakan'Andriamanitra amin'ny fanara-raotana ny fahalemeny.
Vonona hanimba amin'ny alalan'ny fakam-panahiny ireo izay tsy mametraka ny filany ambany hofehezin'ny hery ambony kokoa i Satana, ary lotoiny amin'ny filibana ny fanahiny. (...) Tsy voatery ny toetra ambany na maivana no tena kendreny, fa amin'ny alalan'ireo izay manaiky ampiasainy hitaona sy hisarika lehilahy sy vehivavy ho amin'ny fanaranam-po melohin'ny lalàn'Andriamanitra no amelarany fandrika. Ireo mitana andraikitra ara-panahy lehibe, mampianatra ny fitakian'ny lalàn'Andriamanitra, sy manambara teny manokana ny lalàna, izay tafihin'i Satana toy izany, dia izy ireo no ampiasan'i Satana ny herin'ny helo rehetra sy ny anjeliny mba handavoana azy amin'ny fanararaotana ny fahalemeny. Fantany mantsy fa izay meloka amin'ny iray loha, dia meloka amin'izy rehetra, ary dia ho eo ambanin'ny fifehezany tanteraka ilay olona. Iharan'ny fahasimbana avokoa na ny saina na ny fanahy na ny vatana. Akory ny halehiben'ny fandresena azon'i Satana raha ireo iraky ny fahamarinana sy manana fahazavana lehibe, na koa nampiasain'ny Tompo manokana hampandroso ny fahamarinany no lavony! Akory ny fifaliany! Afa-baraka Andriamanitra! (...)
Fantatr'i Satana fa efa tonga ny fotoany. Tsy manam-potoana firy hiasana intsony izy ka hanampatra ny heriny lehibe mba hamandrihana ny vahoakan'Andriamanitra amin'ny lafin-toetrany izay mampalemy azy indrindra. (...) Mila ambenana tokoa ny saina ary asiana fefy ny fanahy amin'ny alalan'ny taridalan'ny Tenin' Andriamanitra, ka tandremana avokoa ny eritreritra sy ny teny ary ny asa tsirairay mba tsy ho voafitaka hanota. — RH, 17 May, 1887.