"Ireo no mpanefy vilany sy mponina tany Netaima sy Gadera; tany no nitoerany tamin'ny mpanjaka hanao ny asany."- 1 Tant. 4:23
Mofon’aina:
Irin'ny Tompo ny hanabeazana sy hanofanana ny sain'ny tanora kristianina, mba hahafahan'ny miaramila tanora manao ny ezaka ambony indrindra; saingy tsy azo atao izany raha tsy miara-miasa amin' Ireo anjelin'ny lanitra izy ka manararaotra ny tombontsoa rehetra handraisany fanofanana sy fahalalana mampitombo. Irin'ny Tompo ny hahatonga anao ho mahatoky amin'ny zava-madinika, ka hanao araka izay tsara indrindra mety ho vita ianao eo amin'ny adidinao isan'andro, izay toa kely sy maivan-danja. Tandindomin-doza ianao amin'ny fotoana ahatsapanao fahafaham-po nefa manao asa zara raha vita. Tsarovy fa mendrika ny hatao tsara ny asa izay atao.
Eo akaiky mandrakariva i Satana mba haka fanahy izay olona miasa ho an' Andriamanitra. Hambarany aminy fa tsy mampaninona raha atao an-tsirambina ny asa, satria tsy hisy hahalala izany. Aoka tsy hisy olona ho voafitaka amin' izany tolo-kevitra izany. Ianao ihany mantsy dia efa mahatsapa fa tsy nahatontosa ny adidinao ka ho verinao amin'izany ny fanajanao ny tenanao sy ny fatokisan-tenanao. (...) Ny fanaovanao mosalahy ny asa dia fanazaranao ny tenanao tsy hanatontosa tsara ireo adidy eo amin'ny fiainana (...).-YI, 29 Septambra 1892.
Tsy misy zavatra tsy ilaina ao anatin'ny drafitra napetrak' Andriamanitra ho an'ny Kristianina tsirairay. Misy lesona natao :..anaran' ny tsirairay eo amin'ny fiainana andava-nandro. Mahareta, ary ataony amim-pahatokiana ny asa nampanaovina anao, na dia tsotra sy madinidinika aza izany. Ataovy amim-pilaminana ny asanao ary miantehera amin'ny hery avy amin'Andriamanitra. Aza miahiahy ny amin'ny ampitso. Ampiasao amin'ny fomba tsara indrindra ny fotoana omena anao anio. Aoka hamirapiratra ho an'i Kristy ny fahazavanao anio, na dia eo am-panaovana asa madinika aza. (...) Ny fanaovana amim-pahatokiana ny adidy anio no hanomana anao ho amin'ny asa rahampitso, amin-kerim-po vaovao, ka hanao hoe: "Efa novonjen'i Jehôvah aho hatramin' izao" (1 Sam. 7:12)! Aoka ianao hiambina mandrakariva eo anatrehan'i Jehôvah.-L, 1, 1904.