Lesona Sekoly Sabata Herinandro

Hodinihina mandritra ny herinandro: Isa. 1:2-15; Heb. 10:3-10; Eks. 12:1-11; 1 Kor. 5:7; Hag. 2:7-9; Isa. 6:1-5; Apôk. 4:7-11.

Tsianjery:

"Ary nihira fihiram-baovao izy ka nanao hoe: Hianao no mendrika haka ny boky sy hamaha ny tombo-kaseny; fa voavono Hianao, ary ny ranao no nanavotanao ho an'Andriamanitra olona avy tamin'ny fokom-pirenena rehetra sy ny samy hafa fiteny, sy ny olona ary ny firenena rehetra." - Apôk. 5:9.

Hoy i Jaona mpanao batisa rehefa nanatona azy i Jesôsy : "Indro ny Zanak'ondrin'Andriamanitra, Izay manaisotra ny fahotan'izao tontolo izao!" Jao. 1:29. Manambara mazava ny amin'ny biby atao fanatitra alatsa-drà izany, izay manondro ny sorona nataon'i Kristy tamin'ny nahafatesany teo amin'ny toeran'ny taranak'olombelona.

Tsy afa-miala amin'io lohahevitra momba ny fanatitra io isika ao amin'ny Baiboly manontolo. Mitana toerana manan-danja izany ao amin'ilay toe-javatra lehibe ao amin'ny Apôkalipsy, izay nitondrana an'i Jaona ho eo anatrehan'ny seza fiandrianan’Andriamanitra (Apôk. 4,5). Manampy tokoa amin'ny fahatakarana ny vanim-potoana ara-paminaniana manontolo ny fisehoan'i Jesôsy eto amin'ny endriky ny zanak'ondry efa voavono (Apôk. 5:6).

Handinika lohahevitra vitsivitsy mikasika ny fanatitra isika amin'ity herinandro ity, izay manampy antsika hahafantatra mazava ny amin'i Jesôsy , Ilay Zanak'ondry voavono, Izay mpandray anjara fototra ao amin'ilay toe-java-miseho eo amin'ny seza fiandrianan'Andriamanitra. Ekena ho mendrika Izy, ary tsy misy ankoatra Azy. Midika zavatra betsaka momba izay nataon'ny Tompo tamin'ny alalan'ny rafi-pisoronana io fahamendrehany manokana io. Maneho Azy ho Andriamanitra fitiavana mandrakizay izany, Izay nanao ilay fanatitra faratampony - fihetsika iray izay hampitolagaga antsika sy ny mponin'ny lanitra mandrakizay.

*Famerenana ny lesona ny sabata 10 May.

Mazana ahafantarantsika zavatra betsaka ny fampitahana hevitra anankiroa. Maro ny fahalalana mety ho azontsika momba ny toetry ny fanatitra ara-Baiboly rehefa dinihintsika ny nandavan'Andriamanitra ny fanatitra nataon'ny vahoakany.

Ampitahao ny Isa. 1:2-15 sy ny Isa. 56:6,7 ary ny Sal. 51:17. Inona ireo lesona lehibe ampianarina antsika eto momba ny fanatitra?

Tsy io tranga mampalahelo teo amin'ny tantaran'ny Isiraely io no voalohany nandavan’Andriamanitra fanatitra; nisy toe-javatra mitovy amin'izany koa tany am-piandohan'ny tantaran'ny famonjena, rehefa neken'Andriamanitra ny fanatitr'i Abela fa tsy nankasitrahany kosa ny an'i Kaina. Ahafahantsika mampitaha indray ny fanatitra azon'Andriamanitra ekena sy ny tsy ankasitrahany io toe-javatra niseho tany am-boalohany io. (Jereo ny Gen. 4:3-7 sy ny Heb. 11:4.)

Nanaraka fombafomba fotsiny ny Isiraely tamin'ny andron'i Isaia; nanatanteraka adidy ara-pivavahana fotsiny izy ireo mba hampitony an'Andriamanitra, nefa niaina araka izay tiany ihany. Ny fanatitra nateriny dia niorina tamin'ny fitiavan-tena, tahaka ny an'i Kaina, fa tsy tamin'ny toe-tsaina feno fankatoavana sy fileferana amin'Andriamanitra.

Izany koa no toe-tsaina manentana izao tontolo izao: ny toe-tsaina miseho ho mahavita tena. Naniry hanao izay tiany i Kaina teo amin'ny fiainany. Araka izay heveriny fa mety no nanaovany fombafomba teo anatrehan'Andriamanitra. Azo lazaina ho nanelingelina azy Andriamanitra, nanakana azy tsy hanao izay tiany, saingy natahotra Azy ihany izy ka nanaiky.

Ny fanatitra nangatahin'Andriamanitra kosa no natolotr'i Abela, dia fanatitra nampiseho mazava ny teny fikasan'Andriamanitra momba Ilay Mesía ho avy (Gen. 3:15): zanak'ondry, izay manondro ny asam-pamonjena hataon'i Kristy eo Kalvary.

"Nazava tamin'i Abela ny foto-kevitra lehibe momba ny fanavotana. Nahatsiaro ny tenany ho mpanota izy ka nahatsinjo ny fahamelohany sy ny fahafatesana izay tambin'izany nampisaraka azy tamin'Andriamanitra. Raha nitondra fanatitra alatsa-drà izy dia nanaiky ho diso tamin'ny lalàn'Andriamanitra; ka nahita tamin'ny alalan'ilay ra nalatsaka, ny fanavotana hatolotr'llay Mpamonjy ho faty hisolo azy. Izany no sady nahazoany fankasitrahana no nandraisany fahamarinana." - PM, t. 51,52.

Nahoana no zava-dehibe tokoa ny miaro tena mba tsy hanao ny fivavahana ho fombafomba fotsiny? Ahoana no ahafahantsika manao fanandramana ny atao hoe tsy manana fanantenam-pamonjena isika afa-tsy amin'ny fianteherana tanteraka amin'ny fahafatesan'i Jesôsy ho antsika?

Nokianin'ny olona sasany ny rafi-pisoronana sy ny mombamomba azy rehetra, ka nolazainy fa fanao tsy mifaditrovana, masiaka, ary amin'ny lafiny iray, tsy ara-drariny izany. Kanefa, izany indrindra no hevitra fonosiny. Maty tamin'ny fomba tsy mifaditrovana, feno fahasiahana, ary tsy ara-drariny i Kristy - Ilay tsy manan-tsiny maty ho an'ny olo-meloka. Izany no tsy maintsy natao mba hamahana ny olan'ny fahotana. Ary io fahafatesan'i Kristy io, no notondroin'ireny sorona rehetra ireny.

Vakio ny Heb. 10:3-10. Inona no ampianarin'ireo andininy ireo antsika momba ny fanatitra nataon'ny vahoakan'Andriamanitra tao amin'ny TT? Raha tsy mahavonjy marina ny mpanota akory ireny, nahoana no natao Ihany?

Tandindona ihany ny zanak'ondry sy ireo biby hafa atao fanatitra, natao haneho Ilay Zanak'ondrin'Andriamanitra hatao fanatitra ho fanavotana. Finoana no nanaovana izany; nomena fomba azo tsapain-tanana ny mpanota hahafahany maneho finoana ny asan'llay Mesia ho avy. Ireo biby atao fanatitra no antsoina hoe "tandindona", fa i Jesôsy no "tena izy".

Mitovitovy amin'ny fandoavana saran-dalana nyfanaovana ireofombafombam-pivavahana amin'ny fanatitra. Rehefa mividy tapakila handehanana fiaran-dalamby na fitateram-bahoaka na fiaramanidina ianao, dia tsy afaka misitraka ilay dia eo no ho eo ihany. Fa taratasy na tapakila kosa no omena anao, izay marika mampanantena fa ho azonao atao tokoa ilay dia amin'ny hoavy. Na ipetrahanao araka izay fomba itiavanao azy aza io sombin-taratasy io, dia tsy hitondra anao velively any amin'ny toerana tokony halehanao. Saingy rehefa tafiditra ny fiara na ny fiaramanidina kosa ianao ka manomboka ny dianao, dia efa azonao izany ilay nandoavanao vola teo; tsy ilaina intsony ilay tapakila taratasy.

Toy izany koa ny amin'ireo fanatitra alatsa-dra. Nitana anjara asa lehibe izy ireo, kanefa rehefa tonga ilay fanatitra tena izy, dia tonga tsy misy vidiny intsony izy ireo. Nohamafisina izany fahamarinana izany rehefa rovitra ilay efitra lamba nanasaraka ny fitoerana masina sy ny fitoerana masina indrindra tamin'ny fotoana nahafatesan'i Jesôsy . "Ary ny efitra lamba tao amin'ny tempoly dia triatra nizara roa hatrany ambony ka hatrany ambany." - Mar. 15:38. Nanondro ny fahafatesan'i Jesôsy teo amin'ny hazo fijaliana avokoa ny rafi-pisoronana sy ny tempoly manontolo. Nanjary tsy nilaina intsony ny tandindona rehefa tanterak'i Jesôsy teo amin'ny hazo fijaliana ilay fanatitra tena izy ka nitsangana tamin'ny maty tamim-boninahitra Izy.

Saino ny maha-ratsy indrindra ny fahotana, hany ka tsy nisy nahazoana nanavotra antsika afa-tsy ny fahafatesan'i Jesôsy , Ilay Teny tonga nofo (jereo ny Jao. 1:1-3,14). Inona no tokony hambaran'izany amintsika mikasika ny tokony ho fihetsitsika manoloana ny fahotana?

Intelopolo eo ho eo no iantsoan'ny bokin'ny Apôkalipsy an'i Jesosy hoe: "Zanak'ondry". Hatrany am-piandohan'ny drafi-panavotana, dia nataon'ny vahoakan Andriamanitra ho tandindon'ny Mesia ho avy ny zanak'ondry. Nitondra ny voalohan-terak'ondriny i Abela (Gen. 4:4), ary talohan'ny nialan'ny Isiraely tao Egipta ho any amin'ny Tany Nampanantenaina, dia nasaina namono zanak'ondry iray taona hatao fanatitra izy ireo mba hanavotana ny lahimatoany rehetra na olona na biby (Eks. 12:5).

Vakio ny Eks. 12:1-11; Isa. 53:7,8; 1 Kor. 5:7; ary ny Apôk. 5:6. Inona no ampianarin'ireo andininy ireo antsika momba an'i Jesôsy , fanatitry ny Paska? Midika inona ho an'ny tsirairay avy amintsika izany?

Nisaintsaina ny amin'izay rehetra nitranga i Petera taona maro taorian'ny nahafatesan'i Kristy sy ny nitsanganany tamin'ny maty ary ny niakarany ho any an-danitra, ka nanoratra hoe: "fantatrareo fa tsy zavatra mety ho simba, tahaka ny volafotsy sy volamena, no nanavotana anareo tamin'ny fitondrantena adala, izay azonareo tamin'ny nentin-drazana, fa ny ra soan'i Kristy, toy ny ran'ny zanak'ondry tsy misy kilema ary tsy misy pentimpentina." - 1 Pet. 1:18,19.

I Jesosy irery no nahatanteraka ny fahamasinana takin'Andriamanitra teo amin'ny fiainany maha-olombelona Azy. Ny hafa rehetra kosa dia samy efa nanota, ary ny fiainantsika feno fahotana dia tsy mifanipaka amin'ny toetran'ilay Mpahary antsika.

Nanjary "Adama farany" anefa i Jesôsy (1 Kôr. 15:45). Tonga lafatra Izy teo amin'ny fiainany, ary nahomby teo amin'izay tsy nahombiazantsika. Naneho ny tena tokony ho toetran'ny taranak'olombelona tamin'ny lafiny rehetra Izy. Naneho ny voninahitr Andriamanitra Izy. "Izay nahita Ahy dia nahita ny Ray" hoy Izy tamin'i Filipo, "efa nahita Azy [ny Ray]" ianareo - Jao. 14:9,7.

Ary nohomboana tamin'ny Paska koa i Jesôsy , izay mampiseho fa Izy no Ilay Zanak'ondry tena izy. Nilaza i Jesôsy, ao amin'ny Jao. 18:19,20, fa "niteny miharihary" raha nampianatra. Tahaka izany koa ny zanak'ondrin'ny Paska ao amin'ny Eks. 12:5,6; nasaina nifidy zanak'ondry ho an'ny Paska ny zanak'Isiraely "hotehiriziny", izany hoe, hitan'ny rehetra tsara ilay zanak'ondry mandritra ireo andro maromaro mialoha ny fanatitra. Rehefa nanontany an'i Jesosy momba ny fampianarany ny mpisoronabe, dia nilaza Izy fa ny Tenany dia nampianatra ampahibemaso tao amin'ny tempoly mba ho fantatry ny olona rehetra. Ny fiainany, ny asany, ny fampianarany dia nanambara ny tena maha-Izy Azy marina. Izy no llay Zanak'ondry tsy misy kilema, izay fanehoana amin-kery indrindra ny fahamarinan'Andriamanitra sy ny voninahiny.

Amin'ny fomba ahoana no ahafahantsika maneho tsara kokoa ny toetran'i Jesôsy tonga lafatra eo amin'ny fiainantsika?

Misy hery mifanandrina ao amin'ny tantaran'ny famonjena manontolo. Tian'Andriamanitra haverina ho tahaka ny fahiny ny fifandraisantsika Aminy; te hanakaiky antsika Izy. Saingy handringana ny mpanota ny fitondrana azy ireo eo anatrehany. "Fa tsy Andriamanitra mankasitraka izay ratsy Hianao; tsy hitoetra aminao ny ratsy." - Sal. 5:4, hoy i Davida, ary nampiany koa hoe: "Fa izaho kosa noho ny haben'ny famindram-ponao dia hiditra ao an-tranonao; hiankohoka manatrika ny lapanao masina amin'ny fahatahorana anao aho"-Sal. 5:7.

Vakio ny Hag. 2:7-9. Rehefa nanorina ny tempoly faharoa izy ireo, dia nanao izao fanomezan-toky mahatalanjona izao ny mpaminany Hagay: Ny voninahitr'ity trano ity any am-parany dia ho lehibe noho ny tany aloha. Inona no tian'io faminaniana io holazaina?

Rehefa notokanan'i Sôlômôna ny tempoly voalohany, dia nameno io tempoly io ny voninahitry ny Shekinah ny fanatrehan'Andriamanitra izay niaraka tamin'ny zanak'Isiraely teny an-dalana ho any amin'ny tany Kanana - ka tsy nahajanona hanao fanompoam-pivavahana ny mpisorona noho ny rahona (1 Mpanj. 8:10,11). Rehefa notokanana kosa ny tempoly faharoa, dia tsy teo ny fiaran'ny fanekena, izay maneho ny seza fiandrianan'Andriamanitra, satria nafenin'i Jeremia izany. Tsy hita nameno ny tempoly ny fanatrehan'Andriamanitra tamin'ity indray mandeha ity. Nampalahelo ny rehetra izany. Ahoana no hahatanteraka ny teny fampanantenan'i Hagay?

Tao amin'ny tempoly faharoa dia i Jesôsy mivantana, Ilay Andriamanitra tonga nofo, no niseho. Andriamanitra mihitsy no niala tao ambadiky ny efitra lamba ka niaraka tamintsika mba ho isantsika eto amin'ity tontolo rava ity. Tonga Zanak'olona Ilay Zanak'Andriamanitra, koa afaka nahita ny tavany isika, nandre ny feony, ary nanatri-maso ny nikasihany ilay boka tsy madio, ohatra, sy ny nanasitranana azy (Mat. 8:3). Tsy nentin'Andriamanitra hankany Aminy isika, fa Izy no nankatý amintsika. Nidina nankeo amintsika manokana Izy. Koa izany no mahatonga ny Baiboly milaza momba an'i Jesôsy hoe: "Indro, ny virijina hitoe-jaza ka hiteraka zazalahy; Ary ny anarany hataon'ny olona hoe Imanoela' izany hoe, raha adika: 'Amintsika Andriamanitra" - Mat. 1:23. Saino ny hevitry ny hoe: Nidina Ilay Mpahary ny tontolo rehetra izao, ka tsy vitan'ny niara-niana tamintsika fa maty ho antsika koa.

Tsy isalasalana fa ny hazo fijaliana no fanehoana faratampony ny fitiavan'Andriamanitra. Amin'ny fomba ahoana koa no mety ahitantsika na anandramantsika ny maha-zava-misy ny fitiavan'Andriamanitra?

Tamin'ny fotoana sasantsasany dia nampanakekezina an'Andriamanitra tao anaty fahitana ny mpaminany ka navela hahita ny seza fiandrianan'Andriamanitra. Teo ambonin'ny "eloelo" no nahitan'i Ezekiela izany (Ezek. 1:26); i Isaia kosa nahita izany tao amin'ny tempoly tany an-danitra (Isa. 6:1), ary ny fanoritsoritana mazava indrindra omena antsika dia ny ao amin'ny Apôk. 4 sy 5, rehefa nentina tamin'ny alalan'ny fahitana i Jaona. Ireo tandindona teo amin'ny fanompoam-pivavahana tao amin'ny fitoerana masina, ao amin'ny TT, dia nanondro fa tsy nisy afa-tsy lalana iray ihany no ahazoan'ny olombelona mankeo anatrehan'Andriamanitra, dia ny ran'i Kristy. (Jereo ny Lev. 16:2,14, ohatra.)

Vakio ny Isa. 6:1-5 sy ny Apôk. 4:7-11. Inona avy ny singa mampitovy ireo fahitana roa ireo? Diniho ny filaharan'ireo tranga miseho ao: Inona ny lohahevitra aseho voalohany? Inona no manaraka azy? Inona ny fahamarinana momba an'Andriamanitra asongadina ao amin'ireo fahitana ireo?

Amin'ny fahitana tsirairay, ny zava-miseho voalohany dia ny fanantitranteran'ireo anjely any an-danitra ny fahamasinan'Andriamanitra. Manaitra ny toe-javatra ao amin'ny fahitan'i Isaia: feno setroka ny tempoly ary mihorohoro ny "fanambanin'ny tokonana" rehefa manambara ny fahamasinan Andriamanitra ny serafima. Mitovy amin'izany koa ny fanambarana ataon'ireo kerobima ao amin'ny fahitan'i Jaona: "Masina, masina, masina." (Jereo ny Ezek. 10:14,15 mba hahitana ny mombamomba ireo zava-manana aina antsoina hoe kerobima). Samy nanehoana ny fanetriketriky ny voninahitr Andriamanitra ny mpaminany tsirairay.

Avy eo dia aseho antsika ny fihetsiky ny mpaminany manoloana izany. "Lozako! maty aho! fa lehilahy maloto molotra" - Isa. 6:5 hoy i Isaia niantsoantso, ary i Jaona kosa nitomanin'alahelo satria hitany fa "tsy nisy hita miendrika hanokatra ny boky na hijery azy-Apôk. 5:4. Rehefa aseho mivantana antsika ny fahamendrehan'Andriamanitra, vao manomboka takatsika ny toerana misy ny olombelona: tsy mendrika velively isika, ary mila an'i Kristy ho Mpanavotra antsika.

Maro ireo fiampangana nataon'i Satana tamin'Andriamanitra; nolazainy fa mizaha tavan'olona, tia tena, ary masiaka Izy. Kanefa ny fahitana ny seza fiandrianan Andriamanitra, na ao anatin'ny fotoana fohy monja aza, dia mampiharihary ny laingan'i Satana. Ny fahitantsika an'i Kristy amin'ny maha-Izy Azy marina, dia llay "Zanak'ondry, Izay novonoina" - Apôk. 5:12, no ahafahantsika mahita ny Ray amin'ny maha-lzy Azy marina. Mampahery ny mahafantatra fa izay mahita an'i Jesôsy dia mahita ny Ray (Jao. 14:9). Ary i Jesôsy maty teo amin'ny hazo fijaliana ho antsika no fanambarana miezinezina indrindra momba ny toetra aman'endriky ny Ray.

Koa zavatra roa loha no tokony ambaran'ny hazo fijaliana amintsika: voalohany, ny halehiben'ny fitiavan'Andriamanitra antsika ka namoizany ny ainy toy izany, ho antsika; ary faharoa, ny haratsin'ny fahotantsika sy ny fahalavoantsika, hany ka tsy nisy nahazoana namonjena antsika afa-tsy ny hazo fijaliana.

Mazava ny voalazan'ny Soratra Masina fa i Kristy irery ihany no mendrika hanatanteraka ny famonjena antsika. Ny fiainany no hany fiainan'olombelona tsy voapentin'ota, ohatra amin'ny fiainana izay nanome voninahitra tanteraka an'Andriamanitra Ray. Izy no Zanak'ondrin'Andriamanitra tsy misy kilema, ary ankehitriny dia mijoro amin'ny maha-Lohan'ny taranak'olombelona Azy Izy, ho antoka mandrakizay ho antsika. Ary nitondra ny helotsika koa Izy ka nahafa-po ny fitsarana izay tsy maintsy nasetrin Andriamanitra ny faharatsiana. Raha mbola talanjona nijery ireo zava-manana aina tany an-danitra nanodidina ny seza fiandrianan'Andriamanitra i Jaona, dia nilazana mba tsy hitomany intsony satria "ny Liona avy amin'ny firenen'i Joda (...) dia efa naharesy" - Apôk. 5:5.

Saino koa ny maharatsy ny fahotana sy ny halalin'ny fahalavoan'ny olombelona, hany ka tsy nisy vahaolana ho an'izany afa-tsy ny fahafatesan'i Jesosy, dia Andriamanitra mihitsy. Inoana fa raha nahita fomba hafa azo namonjena antsika Andriamanitra, fomba izay tsy mandika ireo fitsipiky ny fitondram-panjakany, dia izany no ho nampiasainy.

"Nitady ny ain'ny mpandika azy ny didin'i Jehôvah nohitsakitsahina. Masina toa an'Andriamanitra mihitsy izany didy izany, ka tsy maintsy izay mitovy aminy no atolotra mba ho fanavotana ny olona sy hampihavana azy indray amin'Andriamanitra, Ilay Tompon'ny voninahitra sy Mpitarika ny tafiky ny lanitra rehetra, Izy no mitovy amin'Andriamanitra. Mba hahazoany manatanteraka izany adidy izany, dia tsy maintsy mandray ao amin'ny tenany ny heloka sy ny mariky ny fahotana Izy, hidina hatrany amin'izay farany ambany indrindra amin'ny fahafaham-baraka ka hosarahina amin'ny Ray (...) ka dia nanaiky hanao ny fanavotana Izy sy hiaritra ny loza rehetra vokatr'izany." -PM, t. 41.

FANONTANIANA hifanakalozan-kevitra

1. Toy ny efa "voavono" no nahitan'i Jaona ilay zanak'ondry teo amin'ny seza fiandrianana. Hitantsika ao amin'ny Apôk. 13:8 fa "voavono hatramin'ny nanorenana izao tontolo izao" i Jesôsy. Raha efa vonona talohan'ny nilantsika azy ny drafi-pamonjena, araka izany, inona no ambaran'izany momba an'Andriamanitra?

2. Maro amin'ireo tsy mino ny fisian'Andriamanitra ("athée") no milaza fa isika dia ao anatin'ny tontolo iray lehibe mangatsiaka, tsy misy mpihevitra, ary tsy misy ankoatra antsika. Ny Baiboly anefa tsy vitan'ny miresaka momba an'Andriamanitra fa milaza ny amin'ny fitiavany izao tontolo izao koa, hany ka nidina teo aminy mihitsy Izy, ary nahafoy ny ainy ho azy aza. Tokony hanao ahoana ny fomba fijerintsika izao tontolo izao sy ny toerana misy antsika ao anatin'izany, raha mitaha amin'ny an'ireo tsy mino an'Andriamanitra mihitsy? Izany hoe, amin'ny maha-zava-misy marina ny hazo fijaliana, inona no tokony ho akon'izany eo amin'izay rehetra ataontsika?

3. Nahoana no tsy nisy fomba azo namonjena ny taranak'olombelona afa-tsy ny fiainan'i Kristy sy ny fahafatesany ary ny fitsanganany tamin'ny maty? Eto indray, ahoana no anehoan'izany vidiny lafo dia lafo izany ny tena maharatsy ny fahotana?

Hodinihina mandritra ny herinandro: Isa. 6:6-8; Gen. 3:21-24; Ezek. 1:4-14; Apôk. 4:1-11; Nom. 2:3-25; Isa. 14:12-14.

Tsianjery:

"Ary nandre ny feon'ny Tompo aho nanao hoe: Iza no hirahiko, ary iza no handeha ho irakay? Dia hoy izaho: Inty aho, iraho aho." - Isa. 6:8

Miorina eo amin'ny toerana maha-Mpahary ny zavatra rehetra an' Andriamanitra sy eo amin'ny Toetrany ny zony hanapaka an'izao rehetra izao (Apôk. 4:11). Rehefa tonga amin'ny fahafantarana ny toetra marin'Andriamanitra isika vao manomboka mahatakatra ny fomba sy ny antony tsy hahatraran'ny olombelona mpanota ny voninahitr'Andriamanitra (Rôm. 3:23).

Hijery bebe kokoa mikasika ny fahitana momba ny seza fiandrianan' Andriamanitra isika amin'ity herinandro ity; hodinihintsika koa ny fomba ifandraisan'ny olombelona amin'ilay Andriamanitra masina sy ny fomba amerenan'ny sorona nataon'i Kristy antsika amin'ny laoniny sy ampanakaikezany antsika amin'ny seza fiandrianan'Andriamanitra. Drafitr'Andriamanitra ny hamerina antsika amin'ny laoniny, tsy ny tsirairay avy amintsika fotsiny fa isika taranak'olombelona manontolo, mba hanehoantsika indray ny Voninahiny amin'ny voary rehetra. Amin'ny fandalinana ny Baiboly ihany no hahitantsika ireo teboka manan-danja izay manampy antsika hahatakatra sy hanomboka hankamamy ny fiantsoana ambony niantsoan'Andriamanitra antsika, taranaka mpanota voavela heloka sy voavotra.

Hofaranana ary tsy hisy intsony mandrakizay ny fikomian'ny olombelona. Ary mihoatra noho izany, dia hamirapiratra bebe kokoa noho ny famirapiratany araka ny fikasany ho an'ny olombelona tany am-piandohana ny toetran'Andriamanitra be fitiavana sy ny fandavan-tenany ary ny fahafoizan-tenany. Na dia tsy tao anatin'ny fikasan'Andriamanitra aza ny hahalavo ny olombelona, dia nasongadina tamin'ny fomba miavaka tamin'ny alalan'ny hazo fijaliana ny toetran'Andriamanitra be fitiavana.

*Famerenana ny lesona ny sabata 17 Mey.